‘Ura, giza aurrerapenaren funtsezko zutabea’
Urak funtsezko zeregina du giza garapenean. Izan ere, uraren kudeaketa egokia funtsezkoa da osasun publikorako, elikagaien segurtasunerako, garapen industrialerako eta ingurumena babesteko. Klima-aldaketak eta populazioaren hazkundeak baliabide hidrikoekiko presioa handitu ahala, gero eta beharrezkoagoa da ura modu bidezkoan eta jasangarrian eskuratzea bermatzen duten politikak martxan jartzea.
Osasuna
Uraren alderdi kritikoenetako bat osasunarekin duen harremana da. Azken hamarkadetako aurrerapen txikiak gorabehera, 2.000 milioi pertsonak ez dute edateko urik etxean Osasunaren Mundu Erakundeak (OME) jakinarazi duenez, eta egoera horrek gaixotasunak zabaltzen laguntzen du. Ur segurua eskuratzeak nabarmen murrizten ditu arriskuak, osasuna hobetzeaz gain pertsonen bizi-itxaropena handitzen baitu.
Nekazaritza
Ura ezinbesteko baliabidea da nekazaritzarako. Eskualde askotan, bereziki hegoalde globalean, nekazaritza da diru-iturri nagusia eta hornidura fidagarririk gabe, uztak gal litezke, eta, ondorioz, elikagai eta ekonomia aldetik segurtasunik eza sortu. Beraz, uraren kudeaketa eraginkorra ezinbestekoa da elikagaien segurtasun globalerako.
Industria
Industria uraren menpe dago neurri handi batean, manufakturen ekoizpenetik hasita energia sortzeraino. Uraren eskasiak mugatu dezake eraginkortasunez jarduteko gaitasuna, eta eragina izan dezake ekonomian eta enpleguan. Industrian ura arduraz eta modu jasangarrian erabiltzea funtsezkoa da kutsadura murrizteko eta etorkizuneko belaunaldientzat ur-baliabideak zaintzeko.
Ingurumena
Ura ere ezinbestekoa da ingurumena babesteko. Ur-ekosistemek, hala nola ibaiek, lakuek eta hezeguneek, bizi-aniztasun handia dute, eta funtsezkoak dira oreka ekologikorako. Baliabide hidrikoen gehiegizko ustiapenak eta kutsadurak ekosistema horien degradazioa eragin dezakete, eta biodibertsitateari zein haien mende dauden giza komunitateei eragin.
Kezka eta premia testuinguru honetan sortu zen BEOW, Basque Environment and Ocean Week, eta 2024an hirugarren edizioa egin du. BEOW dibulgazio-astea da, herritarrei irekia, ingurumenari eta ozeanoei buruzko alderdi garrantzitsuak hurbiltzeko. ICLIk aurtengo zein iazko edizioan ur gezari eskainitako jardunaldian egotearen pribilegioa izan du.